Ο Τσίπρας εγέντονε ατλής
με τ’ άσπρον τ’ αλογόπον,
μίαν κι άλλο αν έβγαινεν
θ’ επαίρνεν παϊτονόπον..
Το καπαέτ’, ντ’ εποίκε ‘μας,
αρ έναν μνημονόπον,
ακόμαν ‘κ’ έντονε πελίν
‘ς ση κοσμί το κωλόπον..!
΄΄Ατόν, π’ εκατηγόρεσαν,
άψιμον να πιάν’νε,
τ’ οσπίτια τουν να καίουνταν
κι ατοίν να μη προφτάν’νε..΄΄
Κι ο Μειμαράκης ΄΄καθαρός΄΄
ντ’ έβγαλεν τα παράδας,
‘ς ση γαρής ατ’ το όνομαν
έστεκαν μουταράδας…
Και το ΠΑΣΟΚ εγέντονε
άμον το κιλοτάκι,
ντ’ εφόρεσεν η πρόεδρος
‘ς σο νυφικόν κρεβάτι..
Και το ποτάμ’, άμον ντο πάει,
θα ίνεται ορμόπον,
Τη Μέρκελ’ πολλά αγαπά
κι ατό το μνημονόπον..
Το Κ.Κ.Ε πα χαίρεται
με τ’ αλλονών τα χάλια,
παράν ντο ‘κ’ έχνε οι αθρώπ’
κ’ εφόρεσαν παρτάλια…
Ο Λαφαζάνης πα γελά,
θα ίνετ’ αρχηγός ι,
θα τσερίζ’ τα μνημόνια,
εθαρρείς μαναχός ι.
Κι ας όλτς πολλά εχάρενα
ο ΓΑΠ, ο Παπανδρέους,
ντ’ επέμνεν έξ’ ας ση Βουλήν
κ’ εγέντον τη ελέους…
Άντσαχ η Ραχήλ η Μακρή,
καλέσα σοφερίνα,
‘ς σ’ όποιον κόμμαν κι αν λαγγεύ’
ίνεται βουλευτίνα…!
Ψηφίστεν με τα κλάματα,
ψηφίστεν με το γέλος
ίντιαν και να ψηφίζετεν
‘κι θα λιφτάζ’ το χρέος…
Κ’ εκείν’ η λίστα, η Λαγκάρντ,
ατσάπα ντο εγέντον;
Νέ ήλον εφωσφώταξεν
και νέ ο κόρτς, ο φέγγον…!
