Αυτός, που φοβάται, ότι θα κατακτηθεί,
είναι σίγουρος για την ήττα.
Ναπολέων Βοναπάρτης, 1769-1821
Ο Αλέξης Τσίπρας πολεμά
‘ς σο γιάν ατ’ ο Καμμένος
κι ο Βαρουφάκης αραεύ’
τα ευρώ σασιρεμένος.
Εξέβανε κι οι Έλλενοι ‘
΄ς σο σύνταγμαν μερέαν,
να βάλ’νε ράχιαν ουλ’ μαζί
‘ς ση Τσίπρα την παρέαν.
Απάν εσουν ‘κρεμάγαμε
Τσίπρα και Βαρουφάκη,
μη κατηβάζετεν κιφάλ’
ας έχετεν ιθάκ’ ι.
Ετσάιξαν κ’ εκούιξαν
ν’ ακούει το Βερολίνον,
το χρέος, τ’ ανεξόφλητον,
έντονε άμον χτήνον.!
Έκ’σεν α’ και ο Σόιμπλερ,
ο τρισκαταραμένον,
την Ελλάδαν θελ’ να ελέπ’
‘ς σα γόνατα ρουγμένον.
Το χρέος, ντο εδέκες ‘μας
έπαρ ‘το βύρια, βύρια !..
γιατί ‘ς σο τέλος ντο θα παίρτς
έναν τσουβάλ’ αχύρια..
Η Μέρκελ, η χαϊνενα,
θα κόφτ’ ‘μας τα συντάξεις,
είπεν α’ και ξάν είπεν α’
ας σα τηλεοράσεις.
Κανείται, ντ’ επροσκύνεσαμ’
την Άγγελαν την Μέρκελ,
τα δύο τα ποδάρια μουν
‘ς σ’ έναν απέσ’ εσέγγεν.
Τον κόσμον εγαιμάτωσεν
μίαν και άλλο μίαν…
κι ατώρα πίν’ το γαίμα μουν
με την οικονομίαν.
Γουρπάν,, Τσίπρα να ίνουμες
‘ς σο μεσιακόν το πόϊ σ’,
την Μέρκελ μη σαεύς ατέν
ας είσαι τεπεκιόης.
Εμείς ‘κι λογαριάζουμε
γερμανοκρατορίαν,
μ’ όλεν τον κόσμον έχουμε
εγάπην και φιλίαν.
Έχουμ’ και τα πετρέλαια
‘ς σην γην απές, ντο κείνταν,
έναν τρυπίν ν’ ανοίγομε
εμάς κι ατείντς κανείνταν…
επωδός
Αβούτο το αλισβερίσ’
ας έχ’ καληδρομίαν !..
Τσίπρας με τα νεότητα τ’
ν’ εντούνεν τα θερία…
Λεξιλόγιο: μη κρούς οπίσ’ = μην υποχωρείς ,σασιρεμένος= σαστισμένος, ιθάκ’ ι= τσίπα -συνέπεια . τεκίρια = ρόδες, βύρια , βύρια= σιγά, σιγά. γουρπάν = σε παρακαλούμε. μεσιακόν= μεσόκοπο. τεπεκιόης = κύκλωπας. καληδρομία = καλό δρόμο.
