Τι σχέση έχει με την αγάπη ο έρωτας;
Η αγάπη είναι αυταπάρνηση, ο έρωτας εγωισμός.
Άγγελος Τερζάκης, 1907-1979, Έλληνας συγγραφέας
Τ’ αρνόπο μ’ κείται διάπλετον, επίασεν τον τόπο μ’,
τ’ ομμάτια θε ετσούπωσεν, άμον αγγελικόπον.
Τ’ αρνόπο μ’ λέει και χαίρεται, ‘ς σον ουρανόν πετάει,
παίρ’ ας σ’ αστρόπα άψιμον και το καρδόπο μ’ κάει.
Τ’ αρνόπο μ’ ξανθομέταξον, άσπρον ,άμον χιονόπον,
φοούμαι, γιαμ’ θα λύεται ‘ς σο ζεστόν τ’ εγκαλόπο μ’.
Τ’ αρνόπο μ’ πάει και κάθεται σ’ εκάθουμνε το μέρος.
κι άλλο βαθέα κρούει ατό ‘ς σο κάρδοπο μ’ το βέλος.
Τ’ αφορισμένον η σεβτά γριβών ‘ς σοι νεοντάδας,
κι άμον σκωλέκ’ τα κάρδοπα, ανοίει ατά γεράδας.
Τ’ εγάπ’ς το πρωτοφίλιαμαν ανάσπαλτον ‘κι χάται,
κι άλλο η σέβτα ‘ς ση ζωήν ’κι κάθετ’ ιραχάτια.
Τ’ εγάπης είσαι μαναχόν και τη σεβτάς το έναν,
όσα να λέω για τ’ εσέν, αρνόπο μ’, ‘κ’ είναι ψέμαν.
Τ’ εμά τ’ ομμάτια ‘κ’ έκλαψαν, κ’ εδέκρωσαν, καμίαν,
μόν’ για τ’εσέναν έκλαψαν, κ’ επαρεποταμήγαν.
Τ’ εμόν τ΄ αρνόπον λαλασάρ’, ‘ς σ’ εγκάλοπο μ’ εσπίχτεν,
ας σ’ αστρόπα ‘κ΄εντρέπεται, και νε ας σον Αυγίτεν.
Τ’ εμόν η κάρδια γεραλίν κι η ψη μ’ τσαβυριαμένον,
όποιον πόρταν και ν ανοίεις, η σέβτα απέσ’ κλαμμένον.
Τ’ εμόν τ’ αρνίν χιλιάμορφον, κουρφέματα ‘κι θέλει,
‘ς σον φέγγον φεγγαριάεται, ‘ς σον ήλεν παρλαύει.
