Εγέντον δημοψήφισμαν
απές ‘ς σην εβδομάδαν,
το “όχι” επερίσσεψεν
κ’ εξέβεν ‘ς σην Ελλάδαν…
Κι αέτς ετοπλαεύτανε
‘ς σ’ έναν τραπέζ’ εντάμαν,
γιατί ‘ς ση γούλαν τη κοσμί
ετύλτσανε το ράμαν…
Κι άλλο τα τσοντοκάναλα
‘κι κλαίν και ‘κι δακρίζ’νε
για τοι γέρτς, τοι μαυράχαρους,
‘ς σα Α.Τ.Μ. ντο ρούζ’νε..
Όλια τα θάματα τη γης
έντανε ς σην Ελλάδαν,
γιατί ο κόσμον, εθαρρούν
έν τη χωρί η λάλα…
Ο λαόν επεπέρνιξεν
κ’ έσκωσεν το κιφάλ’ ν ατ’,
Σούλτς, Μούλτς ‘κ’ ελογαρίασεν
Μέρκελ, την κοσκοβάραν..
Ας σ’ ούλτς πολλά εγούεψα
τον Σαμαράν τον μαύρον,
μεσανυχτί, ντ’ εχάτεψαν,
άμον χεσμένον πάρδον…
Κι ο Βαρουφάκης έρρουξεν
ψηλά ας σ’ επουράνια,
γιατί πολλά ετούρτεψεν
τ’ Ευρώπης τα γαρτάλια..!
Ο Τσίπρας μον’ εκέρδισεν
κόμματα και κανάλια,
τ’ ολόερα πακλάεψεν,
επέρεν και τα ζάρια…
Κι ατώρα έρθεν η σειρά
αξάν ‘ς ση λογαρίαν,
την Μέρκελ θα παρακαλεί
και τ’ άλλα τα σκυλία…
Έι, μαύρε Τσίπρα, την παράν
δίν’α’ με την σταγόναν!!
Θ’ εφτάνε ‘σέν να προσκυνάς
και να χορεύς τρυγόναν…!
Αβούτο η Ελλάδα μουν,
τη ήλ’ γεννημασέα,
Απ’ ουρανού θελ’ μάστοραν
κ’ εν ας ση γην χερέαν…
Θέλ’ παλικάρια δίψυχα
και τρισελληνισμένα,
άμον ντ’ εστάθεν ο λαόν
άφοβα, θεριαμένα…
