Ο Βαρουφάκης έφτασεν
‘ς σο Eurogroup επήεν,
έναν κασκόλ εφόρεσεν
κι ας σα γέλτα ελύεν.
Εποίεν άμον άρχοντας
και μ’ όλια τα σειράδας
κι ατοίντς τη σκύλ’ τοι Γερμανούς
‘κ’ εποίκεν τεμενάδας.
Εκλώσταν κ’ εν ετέρεσαν
τη σκύλ’ τον Βαρουφάκην,
νέος, γιοσμάς και έμορφος
και τ’ αχούλ’ ν ατ’ ξουράφιν.
Έτονε και ο Ντάισελμπλουμ
με τα μικρά γυαλιά,
την Τρόικαν, ντο έστειλεν
να παίρ’ ‘μας τα βρακία.
Έτονε κι η αγράσκεμος
ατέ η Λαγκαρντίνα,
με τ’ έναν λίσταν ντ’ έποικεν
το ΠΑ.ΣΟ.Κ. φτερά φύλα.
Κι ο Βαρουφάκης πολεμά
το χρέος να νεβζίζει,
ο Σαμαράς ‘κι σκών’ ατό
κρούει κα’ και ταγιανίζει.
Σύρ’ το μαχαίρ’ ο Σόιμπλερ
Καρφώνει α ‘ ‘ς σο τραπέζι,
θέλ’ ν’ αχπαράζ’ τον Γιάννε ‘μουν
την Τρόικαν ντο χέζει.
Κι ατότε σκούται η Λαγκάρτ,
γελά ‘ς σον Βαρουφάκην,
άμον ατόναν άγουρον
‘κ’ έβαλεν ‘ς σο κρεβάτι ν..!
Αείκον έν το Eurogroup
άλλ’ δίν’νε και αλλ’ παίρν ’νε
κι ας σο πολλά τ’ αλισβερίς
τα χρέητα περισσεύνε.
Πολλά ‘κι πάει, θα παίρουμε
τα ευροπούλια όλια,
γιατί Ελλάδα έναν έν’
κι όλεν ο κόσμον χώρια.
Ζατί ατό εξέρ’ν ατό
οι Γερμανοί κι οι Γάλλοι,
το καλοκαίρ’ Ελλάδα μουν
έν τη Θεού παρχάρι ..
Για τ’ ατό μη νουνίζετεν
τα χρέητα μουν χαρίστεν,
κι ατά, τα τσαζουλέματα
αγλήγορα αφήστεν…
