Τον Τσίπραν τυριαννίζ’ν ατόν
φίλοι και Ευρωπαίοι,
το κηφάλ’ εκατήβασεν
κ’ εθαρρείς όλον κλαίει.
Την παράν επαστούρεψαν
‘ς σα ξένα τα ταμεία,
κ’ εν ας σον Τσίπραν αραεύν’
ν’ εφτάει τη λογαρίαν…!
Ούλ αραεύνε δανεικά,
εξέβαν ‘ς σην αράην,
ΠΑ.ΣΟ.Κ. Ν.Δ και Ποτάμια,
τερούν από μακρά -ν -ι
Αβούτα τα στενέματα
και πώς θ’ απιδιαβένουμ’;
‘Κι αφήν’νε ‘μας οι Γερμανοί
ανάνασμαν να πέρουμ’..
Τον Χίτλερ επολέμεσαμ’
κ’ επλέρωσαμ’ με αίμαν.
Κι ατώρα θα πλερώνουμ’ α’τς
ντ’ εξόδεψαν τα σφαίρας.
Ο Τσίπρας επεπέρνιξεν
κ’ εποίεν ‘ς σην Ρουσίαν.
Εγύλεψεν ας σ’ εμετέρ’τς
κ’ εν ας σην Γερμανίαν.
Οι Ρουσάντ’ αγαπούν εμάς
Ας σα παλαιά τα χρόνια,
εντάμαν επολέμεσαμ’
τοι δίς να μη σταυρών’νε.
Ο Ρούσον έν τ’ εμέτερον
κύρης και αδελφόνι ,
γιατί ‘ς σα φλέβας έχουμε
αίμαν χριστιανικόν-ι…
Σ σον Θ’ό σ’ ‘ς σον Θ’ό σ’, νε Πούτιν μου,
την Ελλάδαν βοήθα,
ατό, ντο επεκρέμ’σανε
‘ς σ’ έναν λεγνίκον τρίχαν.
Πούτιν ,γουρπάν ισ’ λέγω ‘σε,
εμέναν πολεμούνε…
απ’ έξ ‘κι δίν’νε ‘μεν παράν
κ’ εν απ’ απέσ’ ούλ’ κρούνε..
Κι αέτς ο Τσίπρας έφυεν,
‘ς ση Μόσχαν μαναχός ατ’,
ν’ εβρήκ’ ολίγον γιατρειάν
‘ς ση Ρούσονος τα γρόσια.
Λεξιλόγιο: επαστούρεψαν = την παστώσανε, αράην = αναζήτηση, ανάνασμαν = ανάσα, επεπέρνιξεν = πέρασε στην αντίπερα όχθη, επεκρέμ’σανε = επικρέμασαν
