Ενέσπαλαμ’ τον Σαμαράν
και τον Μεϊμαράκην,
γιατί εξέβαν ‘ς σο μεϊτάν,
Άδωνις – Μητσοτάκης.
Εσ’ κ’ έρται κι ο Γιακούμπαγας
ας σην Θεσσαλονίκην,
και Τζιτζικώστα λέν’ ατόν,
ατός θα παίρ’ τη νίκην..!
Γιατί έν ομορφόπαιδον
Γυαλία τ’ τζιτζιλώνι
ατός πα αγραβάτωτος
με το τζίν πανταλόνι.
Αέτς έν, πούλι μ’, αέτς έν,
‘ς σο δύσκολον την ώραν..!
Ευρήκ’νε είναν τελήκαλην
και κυβερνούν τη χώραν..
Ατόν αφκά ‘κι θέλ’ν ατόν,
γιατί έν Μακεδόνας..!
Ατοίν θέλνε τοι Κρητικούς
και τοι Λακεδαιμόνας..
Η Δεξιά και το Πασόκ
εγέντανε χεράδες,
εχάσανε, ντο είχανε,
πρωθυπουργούς γιοσμάδες..
Κι ατώρα τυριαννίουνταν
ν’ ευρήκνε αργηγόν ι,
κι η Φώφη, η Γεννηματά,
έφαεν το σκατόν ι..
Ο Μεϊμαράκης εθαρρώ
‘κ’ εγροίξεν, πως εχάσεν..!
Ατός εσκυλογέρασεν
με τη Ν.Δ. εγράστεν..
Κι ο Μητσοτάκης, ο μικρόν,
ο μικρομητσοτάκης,
τη SIEMENS εταντίνιζεν,
γιατ’ έσονε μορτάκης..
Εξέβεν SIEMENS άγγελος
και τυρριανίζ’ την ψήν ατ’,
κρατεί μαχαίρια ηλεκτρικά
και θελ’ να παίρ’ τον κύρν ατ’…!
Τον Άδωνιν, τον εφτωχόν,
‘ς σα δώδεκα και πέντε
θέλνε να παιγνιτέζ’ν ατόν
με τ’ άλογον να φέρνε…
Ατσά αβού τα εκλογάς
πότε θα παστουρεύνε,
κι άλλο debate μ’ έχουμε
τ’ ανθρώπς μη κοροϊδεύνε ..
Άντσαχ Λεβέντης χαίρεται
άμον μικρόν μωρόπον,
εξέβεν ας σα media
να κόφτ’ το ΣΥΡΙΖΟΠΟΝ…
Κι ατώρα θα καθίζν’ ατόν
σ’ υπουργικόν καρέκλαν
να φορτούται μνημόνια
και τη λαού τα τέρτια…!
Κι αέτς χωρίς τον αρχηγόν
τη Νέας Δημοκρατίας,
θα έρται το μνημόνιον
με τα τυραννισίας…
Τα μέτρα θα περάζ’ν ατά
ίλιαμ’ για τα συντάξεις..!
‘ς σ’ ατό ούλ’ εσυμφώνησαν
όλια τα παρατάξεις..!
Γιατί αλλέως ‘κι ίνεται
‘κι θα παίρνε παράδες,
τριακόσια κοπρομούμουλα
κ’ εξήντα αβαράδες…..!!!
