Ο Σάλτσον, ο χαλατσής, ‘ς σην ζωήν ατ’ ατό, ντο ‘κ’ εθέλνεν ξάι, έτον η εφορία.
Την ψήν ατ’ επαρεδούνεν και ‘ς την εφορίαν έναν παράν ‘κ’ εδίνεν.
Τ’ ορθόν να λέμε εξόν ας σο χαλάεμαν άλλο δουλείαν ‘ς ση ζωήν ατ’ ‘κ’ εποίκεν.
Ολεν το χωρίον ‘ς σην προσωπικήν εργασίαν, ο Σάλτσον ‘ς σα ξένα τα χωρία.
Το γαϊδίρ ν ατ’ πα εθαρρείς και μαθεμένον, επένεν κ’ έρχουτον με τ’ έναν καλατσήν.
Ούλ’ επλέρωναν την εφορίαν, ο Σάλτσον απ’ εκές κ’ έρχουτον…
Όντες έρθεν η κατοχή, όλια τ’ εφορίας τα χρέητα ενεβζήγαν. Ο Σάλτσον τιδέν κ’ επλέρωσεν ας σην κατοχήν κι αδά μερέαν, εξέρνεν την δουλείαν ατ’.
Πάντα ο εφοριακόν έρχουσον ‘ς σο Ίνελι κ’ εράευεν ατόν….
Ο Σάλτσον, άμον ντ’ έλεπεν ατον, επαίρνεν το γαϊδίρ’ κ’ επένεν ‘ς σα ξένα τα χωρία.
Αέτς πα πάντα εσύρναν ατον ‘ς σα δικαστήρια.
Μίαν, δύο, ο δικαστηκόν επουγαλεύτεν κ’ είπεν ατον:
΄΄ Άν δεν πληρώσεις και τώρα, την άλλη φορά θα σε κλείσω μέσα..!΄΄
Ο Σάλτσον, είπαμε, ψην δι και την εφορίαν παράν ‘κι δι.
Όντες εκούξαν ατόν ‘ς σο δικαστήριον, εγροίξεν άλλο ομούτ’ πουδέν ‘κ’ έχ’ ,θα πατούν ατον απέσ’…! Εγόσεψεν το γαϊδίρ’ εφορτώθεν κ’ έναν μάλλινον γεργάν κι αρτούχ εσκώθεν, επήεν με το γεργάν ‘ς σο δικαστήριον.
Άμον ντο είδεν ατόν ο πρόεδρον ερωτά τον: ΄΄ πλήρωσες την εφορία;΄΄
Πρόεδρε, είπα ‘σε, εγώ να τρώγω ‘κ’ έχω…! την εφορίαν θα πλερώνω;
-΄΄Και αυτό, που κρατάς στα χέρια σου, τι είναι;
Ντό να έν’; είπεν τον πρόεδρον, εσύ ας σο είπες θα φυλακώντς ‘με, επέρα το γεργάν κ’ έρθα… ‘ς σα κρύα πολλά ‘κ’ έρχουμαι…
Ο πρόεδρον ατότε εσάσεψεν ας σο θάρρος ατ’ , είδεν με τον Σάλτον τιδέν ‘κ’ ίνεται και είπεν ατον: -΄΄ Φύγε γρήγορα από μπροστά μου και άλλο να μη σε δω.΄΄
Αέτς πα ο Σάλτσον ‘ς ση ζωήν ατ’ έρθεν ,έφυεν και ‘ς σην εφορίαν έναν παράν ‘κ’ εδέκεν…
Ατώρα πα ακούμε χιλιάδες Έλληνες φτωχοί και χρεωμέν’ ,άνεργοι και χωρίς σύνταξην,
χρωστούν ‘ς σην εφορίαν και ‘κι πλερών’νε…
Έι κιτί Σάλτσο, τα μεριαφιάτια σ’ οπίσ’ εκλώσταν…..!
