Προκόπης ο Παυλόπουλον
εγέντον ΄΄βασιλέας,΄΄
με τη Τσίπρα το έλεος,
τη Καμμένου το χρέος.
Καλώς ,καλώς τον πρόεδρον
καλώς κι απόθεν έρθες,
‘ς ση μεζιρέν εκάθουσνε,
΄ς σο μέγαρον ευρέθες.
Μ’ έναν ποτήρ’ κρύον νερόν,
ντ’ ετσάντσεν Κασιδιάρης,
η Δούρου έντον καϊμακάμ’ς
Παυλόπουλον μουχτάρης.
Τοι δις πα μίαν έχρισες,
σκυλόπιστε Ηλία,
εσύ επήες φυλακήν,
κι ατοίν ‘ς σα κυβερνεία.
Η Μπακογιάννη έστρωσεν
γέφυραν ΄ς σον Αλέξην,
να ζει άμον βασίλισσα
μη στάξει και μη βρέξει.
Ατέ πολλά ετάουτον
να πάει ‘ς σην προεδρίαν..
αμαν απάν’ ατς κουβαλεί
του κύρ’ την αμαρτίαν.
Έκάεν κι Αβραμόπουλον
με τα κεβεζελούκια τ’,
ατός για την προεδρίαν
παρ’ είχεν χαβασλούκια..
Ας ούλτς τον Δήμαν τσούζω ‘γώ,
ντ’ έπαιξεν το κιφάλ’ν ατ’,
‘ς σα ψοφεμένα άλογα
έσυρεν την παράν ατ’.
Ατώρα η Ελλάδα μουν
θα έχ’ δεξιόν μουχτάρη
‘ς σον Τσίπραν, τον αριστερόν,
να κρατεί το δουκάλι.
Αναθεμά τα eurogroup,
τα διεθνή ταμεία,
‘ς σα στόματα, ντ’ ερρούξαμε,
ν’ εγλύτωναμε μίαν.
Μ’ αριστερόν πρωθυπουργόν
και δεξιόν μουχτάρη.
Η Ελλάδα μουν θα ταμαμεύ’
και έρχεται ‘ς σο τάβι..
Έϊ ουρανέ μ’, παράκλητε,
δείξο μας έναν στράταν,
να επορούμ’ κ’ εβγαίνουμε
ας αβούτο τη φάκαν….
