Όλοι μιλούν για το δύστυχο, λαό
που πασχίζει για τα 50 ευρώ του Α.Τ.Μ.
Κανείς δε μιλά για τα δίς, που έκλεψαν
και άδειασαν τα Α.Τ.Μ.
Οι Γερμανοί εγέντανε
αξάν κοσμαφεντάδες,
την παράν τσουβαλίασαν
τ’ ευρώ με τα οκάδες.
Όλεν ο κόσμον προσκυνά
την ευρω-Γερμανίαν,
ντ’ εγέντον ΄΄απανώτερος΄΄
‘κοδέσποινα κι αγία!
Ήλεμ’ ατός, ο Σόιμπλε,
Είπεν, ο αφορισμένον,
΄΄τον Έλληναν θ’ εφτάγ’ ατόν
να κείται πεινασμένον΄΄..
Η Μέρκελ’ πα επρόδωσεν
τον γιοσμαλήν, τον Τσίπραν,
ατέ, η κουμουνίστρια,
‘γέντον καπιταλίστρα.
Ας ‘ς σην αρχήν ‘κ’ εθέλεσαν
τον μαύρον, τον Αλέξην!
επέραν την απόφασην
ν’ εφτάν ατόν το GREΧIT..
Βύρια- βύρια τσορκάντσανε
ατόναν ‘ς σα τουζάκια,
ν’ εφτάει το δημοψήφισμαν
χωρίς τα ευρουλάκια.
Κι ολόερα τ’ οι αριστεροί
ομνύουνταν κι ορκούνε,
απάν ‘ς σα ημεροκάματα
καμίαν να μην κρούνε..!
Μαυράχαρε Αλέξανδρε
και μαύρε καπετάνιε…
Ας σον πουρνόν κ’ ετσέριξες
τη κάτας τα ποδάρια…
Εσέν πολλά δερμένεψεν
το ΄΄καφέ Ρωμανία΄΄
να παίρτς τρανόν φραγγέλιον
και κρούς την αδικίαν…
Ατώρα έσκωσαν κιφάλ’
τη γης οι κολασμένοι,
ατοίν, που ‘κ’ εκοιμούσανε
κ’ έσαν άμον χεσμένοι..!
Κι ακόμαν θα φορτών’νε ‘σεν,
ντ’ έχνε τα αμαρτίας,
τα δάνεια, ντ’ εποίκανε
και τ’ άνομα δουλείας…
Ατσά τίνος το καπαέτ’
και τίνος η δουλεία;
Τ’ ευρώ όλια εγέντανε
Μοθοπωρί πουλία!!
Μόν ‘πέμνανε τα χρέατα
και τα τρανά τα λόγια,
και τα μουράτια τη κοσμί
εγένταν μοιρολόγια…!
Κι αρ με τ’ αοίκα έντονε
η Ελλάδα Ελλαδίτσα..
εδέκαν ατέν άψιμον
άμον τη λαμπαδίτσαν!
Κ’ ερθεν, επέμνεν άκλερος
και μαναχή ‘ς σον κόσμον,
χέρα, κουτούλα κι ορφανή
‘ς σο αχαντέρ το δρόμον.
Κι ατώρα, ντο θα ίνουμες;
Εχάθεν η ελπίδα..!
Εχάθεν κι η ΄΄αριστερά΄΄
κι ατέν ακόμαν κ’ είδα μ’…!
Αοίκον έν τ’ ιδίωμαν,
αοίκον έν ο νόμον,
πάντα το σύμφερον νικά
και ο λαόν ‘ς σον δρόμον…!
