Ανάθεμα τ’ αρχοντικούς
τον κόσμον ποι διατάζνε,
φαρμάκια, δάκρυα, αίματα ,
ανέξοδα μοιράζνε.
Αναθεμά τοι εχεμέντς
και τοι καζανεμένους,
με τον χάρον αριποδούν
και κρούν τοι πεινασμένους
Αναθεμά και τον ντουνιάν,
‘πη αναμέν ακόμαν,
να σκών’νε, πάνε, βάλν’ ατόν
με τη ζωήν ‘ς σο χώμαν.
Αναθεμά το μεμλεκέτ’
αλισβερίσ’ ,ντ’ ευτάει,
με τοι κακοπαγιάνευτους
τη διαβόλ’ τ’ αλλάι.
Αναθεμά τοι γραμματέρτς
ντο γράφνε τ’ αναφόρια
και ‘κ’ εγκαλούνε τοι αρχόντς
χάταλα ντο σκοτών’νε..
‘Σ σ’ αβούτα τα καιρούς εμούν,
‘ς σ’ αβούτο το σεφέριν,
πόλεμον θέλνε οι τρανοί
‘ς ση γης τ’ απαδαμέρ’ιν…
Ανάθεμα το δίκαιον
και την δικαιοσύνην,
Έναν βούραν ανούνιγοι
έκλέντσαν την ειρήνην.
Τους 200.000 ξεπέρασαν οι νεκροί από τον πόλεμο στη Συρία, μέσα σε σχεδόν μόλις τέσσερα χρόνια, σύμφωνα με ανακοίνωση του Συριακού Παρατηρητηρίου Ανθρωπίνων Δικαιωμάτων.
