Νε Βαρουφάκη, γιαύροπο μ’,
ντ’ έσυρες ‘ς σα Βρυξέλας,
άλλος τη μάνα σ’ έβριζεν,
κ’ εν άλλος τον πατέρα σ’.
Χαρδούβελης εγέλανεν
όντες επαρεδούνεν,
ατός εξέρνεν, ντο σοϊχά
‘ς σον κώλο σ’ ‘κες θα κρούνε.
Κατηγορούνε οι τουσμάν
κατηγορούν κι οι φίλοι,
ατοίν ‘κ’ είδαν τον Σόιμπλερ
τα φαρμάκια τ’ να ξύνει.
Imail δεκρογαίματον
έστειλεν Βαρουφάκης,
απές γομάτον βαϊνασίν
το διάκρον, καταρράκτης…
Τρία ημέρας έγραφτεν
Ατά, ντο θα παθάνουμ’,
δύο και δύο τέσσερα
‘μέτρεσεν, ντο θα χάνουμ’.
Imail γράφτω, στείλω ‘σεν
με τα γερανοπούλια,
εκειάπες φανερώνω ‘σεν
τ’ Ελλάδας την καμούλιαν.
Imail γράφτω, στείλω ‘σεν
τσιζίν, τσιζίν αρίν’ ι,
αβούτο το πικρόν ποτήρ’
τσι θ’ επορεί να πίνει…
Αλέξη Τσίπρα, ποίσον ‘με
ολίγον συντροφίαν,
‘ς σον ΣΥ.ΡΙ.ΖΑ. ν οι σύντροφοι
έσυραν τα σπαθία….
Ατό κανείς ‘κι αναγνώθ’
κανείς ‘κ’ εξέρ’, ντο λέει,
ο Σόιμπλερ πα ‘κ’ εγροικά
κ’ εν ας σα νεύρα τ’ κλαίει….
Αναθεμά ‘σας, Έλληνες,
και τρίς αναθεμά ‘σας,
τ’ οστούδ’ ν εσούν πολλά γλυκύν,
π’ εξέρ’, αροθυμά ‘σας !
Ικράχ’ ένταν, ντ’ επέρετεν
τα δις τ’ ομολογίας,
άμον τσαμίντσια τρώτε ‘τα
και ξαν ‘ς σα γειτονίας…!
Εμείς μαζί ‘κι ίνουμες
και χώρια ‘κ’ επορούμε,
εσάς μίαν ‘κι θέλουμε
και μίαν αγαπούμε….!
Λεξιλόγιο: Mail = ηλεκτρονικό γράμμα. Postal = ταχυδρομική διεύθυνση. σοϊχά = ανδρικό μόριο. βαϊνασίν= κλαψούρισμα. καμούλια= φλογερός πόνος. τσιζίν αρίν’ ι = ευκρινές γράψιμο. ικράχ= χαράμια. τσαμίντσια= σταφίδες.
