Χριστέ μου, γλύτωσον τ’ ανθρώπ’ς,
γουρτάρεψον τα ψύα,
φάρμακα και εμβόλια
εγένταν βουρ’βουρία…!
‘Σ ση γης τα τεσσαράκοντα,
‘ς ση γης τα τρανταμέρια,
αρχοντοσπούδαστοι γιατροί
εσταύρωσαν τα χέρια…!
Άντσαχ θανατοκρέβατια
γομούνταν κ’ ευκαιρούνταν…
απές τσαπαλαέματα
κι απ’ έξ’ αρχόντ’ ουρνούνταν….!
Όλεν ο κόσμον τη θανάτ’
δίχως να πάει ΄ς σον πάλον..
‘Σ σ’ αβού τα Χριστοήμερα
εζάντινεν ο χάρον….!
Σελέκ’ εσελεκίασεν
με τ’ ανθρωπί τα ψύα,
τα δάκρυα εποταμίγανε
σασεύ η κοινωνία..!
Ανθρωπ’ εκοτσακώθανε
μίαν και μίαν κι άλλο ,
ας σον λοιμόν εγρέθανε
κι ας σον χάρον, τον μαύρον..!
Τη σκήλ’ ο γιόν ξάει ΄κι τερεί
φτωχούς, καζανεμένους,
τοι γεροντάδες στόχεψεν
και τοι πουγαλεμένους…!
Χριστέ μ’, κι αν είσαι τη Θεού
ο μαχαχόν, ο γιόν -ι,
άντσαχ εσύ θα καντουρεύ’ς
αβού τη σκήλ’ τον γιόν-ι….!
Στείλον ‘ς ση γην Αρχάγγελον
να δί’ μας το βοτάν-ι,
απές ‘ς σο τσαβαϊρ-τασουν
τον γουρζουλάν να χάνει…
Πρόφτασον, Θ’έ μου’, πρόφτασον
Χριστέ μ’ και Παναϊα μ’,
αούτ’ η ανθρωπότια μουν
μη χάται τεμελία….!
Λεξιλόγιο:
Βουρ(ι)βουρία= λόγια άνευ περιεχομένου. Γουρταρεψον (τ. γουρταρμάκ) =γλύτωσε, τεσσαράκοντα= στις τέσσερεις άκρες, τρανταμέρια=στα τριάντα μέρη -παντού, τσαπαλαέματα= προσπάθειες για επιβίωση, ουρνούνταν =ουρλιάζουν, ο πάλον=πολεμικός παιάνας -ο πόλεμος, εκοτσακώθανε=εμβολιάστηκαν, καντουρεύς= ξεγελάσεις, Τσαβαίρ-τασουν =ασημένιο τάσι. γουρζούλας=πανδημία, τεμελία= ολοκληρωτικά.
