Έρθανε τα χριστούγεννα,
θ’ έρται το νέον έτος,
τη κόσμονος το βαϊνασίν
‘περίσσεψεν οφέτος..
‘Σ σ’ αβούτο τον Χριστουγεννάρ’
ο Χριστόν ‘κ’ εγεννέθεν,
αγγέλοι ‘κ’ ετραγώδεσαν
κι η πλάση ‘κ’ εχαρέθεν…
Μον’ τα παιδόπα εξέβανε
νωρίς να καλαντίζνε
και με το μικρόν χασλούχ’
δωρόπα να ψωνίζνε..
Κανείς ‘κι λέει ,ντο έντονε,
κ’ εχάθαμ’ ας’ σο χρέος,
ποίος επέρεν την παράν
κ’ εγέντονε ΄΄εβραίος΄΄.
Το χρέος, ντο εποίκανε,
ο κόσμον θα φορτούται,
ξερόν ψωμίν με το κρομμύδ’
θα τρώει και μαρουκούται.
Τ’ εμετερίων οι τρανοί
ψεύτες ,ντο είν’, εξέρουμ’,
κλέφτες ,ντο είναι, ‘κ’ έξεραμ’
κι ατώρα υποφέρουμ’..
Αρ ας’ σ’ ατότε π’ έγκανε
αβούτο το κλεψίον,
‘χάθεν ας’ σον κόσμον απάν’
η προκοπή κι ο βίον.
Πουλίν έρθεν κ’ εμένεσεν
τα μαύρα τα χαπάρια,
φόρους θα βάλνε ‘ς σα ωβά!
κι ίλιαμ’ ‘ς σα πετεινάρια!..
Άγιος Βασίλης έρχεται
από την Καισαρία
΄΄για φόρους και περαίωση ΄΄
λάσκεται τα χωρία.
Άλλο ο κόσμον ‘κι γελά,
‘κι πάει ‘ς σα μοχαπέτια,
Εμόνασεν ‘ς σο σπιτόπον
κι ελύεν ας σα τέρτια.
Άλλο παράν ‘κ’ ευρίεται
δουλείας ‘κι γουρεύκουν,
και τα παιδία τ’ άχαρα
ρούζ’νε και ξενιτεύκουν.
Ανάθεμά ‘σε μεμλεκέτ’,
ντ’ εσάσεψες κ’ επέμ’νες,
‘ς σ’ αβού τον κόσμον ιρεζίλ’
Πέϊ χουζούρ εγέμνες
Λαέ, για λύσον το σκοινίν
και τσάκα το δουκάλ’ι,
έβγα απόψ’ και σύμπιρνα
ποίσον α’τς ΄΄τάρι,μάρ’ι΄΄.
