Δεν χρησιμεύει σε τίποτα να δίνεις βάση στα λόγια κάποιου που είναι είτε ερωτευμένος είτε μεθυσμένος είτε υποψήφιος σε εκλογές.
Shirley MacLaine, 1934-, Αμερικανίδα ηθοποιός
Πολλοί είν’ υποψήφιοι,
πολλοί οι μουστερήδες,
απές ‘ς σ’ αγούρτς ‘ταράγανε
και δύο τρί γαρίδες.
Πρώτεσα και καλόφανος
καλόν να έχ’ ιδέαν.
Βρυζίδου η Παρασκευή
ς σην Άρδασσαν μερέαν.
Ατέ κρατεί τα χαλινά
κρατεί και το τεμόνι,
καλόν κορίτς, καλόν κορίτς,
το γέλος α’τς αλώνι.
Π’ εκάτσεν απάν ‘ς σ’ άλογον
‘κ’ εκατήβεν καμίαν.
Αϊκον η πολιτική
αϊκον η εξουσία.
Κ’ εν απ’ οπίσ’ εχ’ κ’ έρχεται
Σάββας ο Ζαμανίδης,
τη άγιας τη Παρασκευής
έτον ο ευπατρίδης.
Πολλά ατός κουρφεύκεται,
π’ έν ας ση Ζαμανάντας.
Ατοίν ειν’ ας ση γενεάν
τοι Παλαιολογάντας.
Ατός πα θέλ’ να πετσαρεύ’
το τρανόν τη δουλείαν
και ίνετ’ εμπρολάλετος
‘ς ση Καϊλαρί τ’ αυλία.
Κι ας σην αριστεράν εμ’ ‘κές
έρται ο Ζαραφίδης.
Ατός καμίαν ‘κ’ έντονε
μουχτάρ’τς και δημαρχίδης.
Άντσαχ’ αντιπολίτευση
έσαν ατόσα χρόνια.
Ατώρα έρθεν η σειρά
ατοίν πα για να τρώνε.
Ατώρα λέει και τάεται,
να παίρ’ τη δημαρχίαν
και ‘ς σην Δ.Ε.Η. ν να διορίζ’
τ’ άνεργα, τα παιδία.
Ανδρονικίδου πολεμά
ν’ εφτάει συνδιασμόν ι.
Μίαν απάν, μίαν αφκά
΄ς σον δύσκολον καιρόν ι.
Κατηβαίν και ο πτέραρχον
Ο Γιώργον ο Κωτσίδης.
Ατός πολλά βαθυστικός
και πολλά ευγενίδης.
Θέλ’ να αναβαθμίζ’ ατό
μ’ έναν καινούργον πλάνον.
Να σ’κών το Καϊλάρ’ υψηλά
άμον αεροπλάνον.
Το Κ.Κ.Ε. πα έβαλεν
την Κικήν, την Στεργίου,
‘ς σο δεύτερον την Κυριακήν
‘κι πάει εξ’ οφιτσίου.
Ας σο νέον τη γενεάν
Κατηβαίν’ ο Κρυτσάνης
‘Κι ξέρω ,γιάβρι μ’, με τ’ εμάς
ους την άκραν ν’ εφτάνεις;
‘Σ σ’ αβούτο το μιλέτ ν εμουν
ανθεί η γερουσία.
Αρ’ για τ’ ατό εγέντονε
η Ελλάδα μουν χαψία.
Ατοίντς επέρεν το ωτί μ’
‘κ’ εξέρω αν είν’ κι άλλοι.
Θεόν να δί’ ‘μας φώτισην
να δί’ ‘μας και την χάρην.
