ΑΝΕΡΓΙΑ-ΛΟΥΚΕΤΑ-ΧΑΡΑΤΣΙΑ-ΔΑΚΡΥΓΟΝΑ -ΧΡΕΗ-ΑΥΤΟΚΤΟΝΙΕΣ:
ΑΪ ΣΙΧΤΙΡ ΡΕ
Σύνθημα τοίχου
Αναθεμά κι αναθεμά
άμον ατό το χρέος,
ντ’ ερούξεν ‘ς σα κιφάλ’ εμουν
κ’ εν έγκε ‘μας το κλαίος.
Κ’ εν έγκε μας ‘ς σον κατακρεμόν
κι ούς το βαθύν το ρέμαν.
Κ’ εν από παν’ πα λέγ’νε ‘μας
με τα πατμάνια ψέμαν.
Θα έρ’ται η ανάπτυξη
απ’ ουρανού μερέαν.
Εμάς ο Θον ‘κι θ’ ανασπάλ’
Θα δί’ έναν χερέαν.
Ανάπτυξη ‘κι φαίνεται
μόν’ η κακοπερία,
ντ’ ερούξεν από πάν’ ‘ς σ’ ανθρώπ’ς
άμον γουρζουλερία.
Επλώθεν άμον γουρζουλάς
ατό η ανεργία.
Θα τρώει τα ψύα τη κοσμί
και καίει την κοινωνίαν.
Τα ημερικά εχάθανε,
‘λείφτασεν η δουλεία.
Ο κόσμον άλλο ΄κ΄έχ’ να τρώει,
‘κι πάει ‘ς σα καφενεία.
Και οι εργάτ’, ντ’ εχάσανε
το χαζούρ τη δουλείαν,
επέμνανε ‘ς σα δίχωτα
και ‘ς σην απελπισίαν.
Επέμ’νανε ‘ς σο μεσοχάμ’
και ‘ς ση ζωής τη στράταν.
Κανείς ‘κι κλώσκεται, τερεί
τον εφτωχόν ‘ς σ’ ομμάτια.
Ατοίντς, ποι εκυβέρνησαν
κ’ εχάσαν τ’ ανοιγάρια,
να στείλου μ’ ‘ς σον αγύριστον,
να τρέχνε, να μη ‘φτάνε.
Με το κλεψίον έχτισαν
τα νέα παρθενώνας:
Χρηματιστήρια –Ο.Π.Α.Π.,
ΛΟΤΤΟ και ιπποδρόμας.
Ατώρα ‘δεν ‘κ’ επέμ’νε ‘σας
να χάνετεν, αδέλφια.
Εβγάτεν ‘ς σο ξημέρωμαν
με θάρρος και με κέφια..
