Αέτς και πως εποίκανε
αβούτο το μιλέτ’ι,
μίαν να λέει και να γελά
δέκα να σύρ’ το τέρτ’ ι.
Ο Σαμαράς εγόσεψεν
‘ς σον κόσμον τα σαμάρια
να κουβαλεί μνημόνια
και τα τρανά γομάρια.
Ο Τσίπρας μαναχόν τσαϊζ’
να μ’ εγροικούμ’, ντο λέει,
ατσά παράδας πως θ’ ευρήκ’,
και πως θα πετσαρεύει.
΄΄Χρυσή Αυγή΄΄ ντο έβγωσεν
κανείς ‘κι θέλ’ ν’ ελέπει.
άλλος τσουπών τ’ ομμάτοπα τ’
και άλλος τον καθρέφτην.
Το Κ.Κ.Ε. πα αναμετρά
τα ψήφους έναν έναν,
θάρρει με το πορπάτεμαν
θα σ’κούται ‘ς σην αέραν.
Και η ΔΗΜ.ΑΡ. αριστερά
ακούει το ονομάν α’τς,
παλαλός έτον ο ποπάς
και ζάνταινα η μάνα ‘τς.
Και ο Καμένον έκαψεν
σιτ’ έστεκεν τα γένια τ’,
και τα ομμάτια τ’ εβγαλεν
με τα δύο τα χέρια τ’.
Εμείς πα σκύλλ’ μιλέτ’ είμες
κάποθεν αν κι αν σ’κούμες
κρούμε, ταρταγανίζουμ’ α’τς
κι απάν’ ατούν απλούμες.
Τα ψήφους πα θα δίγουμ’ α’τς
μαζί με τα χαράτσια,
αντί για ψηφοδέλτια
θα δίμ’ α’τς παζλαμάτσια.
