Ο Σάλτσον και ο τοπογράφον- Του Παναγιώτη Μωυσιάδη

‘Σ σα 1962 τη χρονίας ‘ς  Ίνελι ( Ανατολικόν )   εγέντον ο πρώτος αναδασμόν τη χωρί.

Έρθεν ας σην Νομαρχίαν ο Γιάννες,  ο τοπογράφον  επέρεν ένα δύο νομάτς ας σο χωρίον   να ευτάν την καταμέτρησην .  Ο τοπογράφον πα επέρεν βοηθόν τη Σωτήρας τον γαμπρόν και  εργάτην  τον Σάλτσον.  Εφτωχός τεϊ να δί ατόν  έναν ημερικόν …

Ο Σάλτσον κρατεί τη ΄΄ σταδίαν ΄΄ και ο Γιάννες, ο τοπογράφον τερεί ας σο τηλεσκόπιον ( χωροβάτην) και απάκρας λαϊζ’ το χέρν ατ’ μίαν δεξιά και μίαν ζερβά… και απιτάζ τον Σάλτσον…

Ο τοπογράφον ολίγον αρσούης  έτον. Από καμίαν ετσάιζεν τον Σάλτσον: ΄΄ γιόχ αγναμάεης είσαι, γιοχ ο νούς ισ’ ‘κι κόφτ,  γιόχ τα χέρια σ’ τρομάζ’νε.

 ο Σάλτσον, ο μαύρον ,χώμαν έτρωεν κι η λαλία τ’ κ’ έβγωνεν..    

Σ’ σ’ ολημέρα απάν’ εκάτσαν ‘ς σ’ έναν ευώραν, ένοιξαν τα τσιαντάκια τουν  και τρών’ τ’ αζούχ’ ν ατούν.     Άμόν ντ’ έπαν κι απ’ έναν ρακόπον , ο Σάλτσον εκλώστεν λέει ατόν  :

• ΄΄ Γιάννε,  ατο τη δουλείαν ,ντ’ εφτάς, τιδέν  ‘κ’ έν’ , εγώ πα εφτάγ α’.. ‘’

Ο Γιάννες ετέρεσεν ατον,  εγέλασεν κ’ είπεν ατον  :

• Νέπε ντο χαπάρ έεις εσύ ας ατά ….
•  Έκσες ντο λέω ‘σε ;  εγώ  πα ευτάγ’ α’.…

Ας  τ’ εσκώθαν, ο  Γιάννες  είπεν τον Σάλτσον:  ΄΄για δέβα ‘ς  σον χωροβάτην, ας τερώ ντο εξέρ’τς.

 Επέρεν την ΄΄σταδίαν ΄΄, επήεν γαρσί ‘ς σον Σάλτσον κι αναμέν  ..

Ο Σάλτσον εκλίστεν ‘ς σο τηλεσκόπιον  κι ας σου ετέρεσεν – ετέρεσεν εσκάλωσεν εφτάει,  ντ’ εποίνεν ο Γιάννες : Δεξιά …δεξιά… όχι ολίγον αριστερά …  ξαν ολίγον δεξιά .. κι άλλο δεξιά.. και σίτε λέει, λαϊζ  το χέρ’ν ατ’ άμον αληθινός.…

Εδέβεν έναν κάρτον.  Κάποτε ο Σάλτσον άστραψεν κ’ εβρόντεσεν,  εσκώθεν  ολόρθα  ετικλάεψεν τα χέρια τ’ έμπρια τ’  και τσαϊζ  τον Γιάννεν:

• ΄΄Νέπε σκύλ’ υιέ , έναν ώραν έσπασες την ψή μ’..  Ολόερα ‘ς σα κάκκαλα μ’ γυροκλώσκεσαι…

Αδά πάν’ …αδά παν’ … ‘κ’ ελέπ’ς:  Αδά πάν’ ‘ς σην καϊπανά μ’ .. ίσα έλα !!!

Ο τογράφον ‘κ’ ενεμείνεν α’.

 Έσκωσεν κ’ έσυρεν τη σταδίαν ‘ς σο χωράφ’ απές  κ’  ερρούξεν κά’ ας σα γέλτα….!