Εσέβαμ’ ‘ς σον Καλομηνάν
και ‘ς σα καλά ημέρας,
την ψήφον εμουν ψαλαφούν
με μαχαίρια και σφαίρας.
Απάκρας πάνε κ’ έρχουνταν
και λένε μας ΄΄ψηφίστεν,
εμέν πα μ’ ανασπάλετεν,
για τ’ εμέν πα κατ’ ποίστεν΄΄!
Θα πάμε να ψηφίζομε
χωρίς χαράν κ’ ελπίδαν,
αβουτοίν οι πολιτικοί
τα δύο πα επήραν.
Εσούμωσαν τα εκλογάς
και ο λαόν νουνίζει,
θ’ εμπαίν’ οπίς ας σην περτέν
‘κ’ εξέρ’ ,ντο θα ψηφίζει.
Ψηφίστεν πλούσιοι εφτωχοί,
ψηφίστεν νουνιγμένοι,
όσοι και να ψηφίζετεν,
τιδέν ‘κι θ’ αρτουρεύει.
Η παρά ελιγόστεψεν,
επέμ’νεν έναν τσίρταν
κι ατοίν κοτέρια τάζ’νε ‘σας,
ντο ‘κ’ είν’, ντο ‘κ’ ευρισκούνταν.
Αφκά ‘ς σο ψηφοδέλτιον
θ’ εβγάλετεν μουχτάρη.
κι απάν ‘ς σο πανωγραφ’ ν αθέ
δήμαρχον, καϊμακάμη.
Ψηφίστεν τ’ απανώτερους
και τοι γραμματισμένους,
ψηφίστεν τοι καματερούς
και όλτς τοι προκομμένους.
Ελάτεν κι ας σην ξενιτέν,
τρέξτεν, διπλοψηφίστεν,
σεκέρ’ και μελοβούτορον
‘ς σο ψωμίν ατουν ξύστεν.
Ατοίν θα διαφεντεύν εσάς
τέσσερα κι άλλα χρόνια,
με τάματα και θάματα
τον κόσμον θα κομπών’νε.
Ψηφίστεν ‘ς σην Ευροβουλήν
κι όλον απάν ‘ς σα Δούμας,
εκές την παράν δίγ’ν’ ατό
με τα δύο τα βούρας.
Ζατί οι Ευροβουλευτές
θ’ εβγαίν’ ας σην Αθήναν!
Εκές τα ψηφοδέλτια
γομών’νε έναν πισίναν!
Εμείς πα αδακές, ζαντοί,
τη κάκου πάμ’, ψηφίζουμ’,
εθαρρούμ’ με το ψήφεμαν
τη μοίρα μουν ορίζουμ’.
Αρ’ γιατ’ ατό γουρπάν’ εσουν
δεβάτεν ούλ’, ψηφίστεν,
κι όλια ατά, ντ’ εξέρνετεν,
‘ς σην Τρόϊκαν αφήστεν…
