Σε δημόσια διαβούλευση το νομοσχέδιο του ΥΠΕΚΑ
για τη διαδικασία πώλησης της “μικρής ΔΕΗ”.
news247.gr
Οι τρει Σωματοφύλακες ας σον Πόντον μερέαν
Εξέβανε την Κερεκήν ν’ εφτάν’ εμάς παρέαν.
Ο ένας ας σο Καραγάτς, δήμαρχος τη Κοζάνης,
Ιωαννίδης ο Λευτέρτς, νέος και πεχλιβάνης.
Ο άλλος ας σο Καριοχώρ’, ο Σάββας ο Ζαμάνον
‘ς σην Καϊλαρί τα ράσοπα θα ίνετ’ ο τσοπάνον.
Κι ο Καρυπίδης ας σο FLASΗ εποίκεν εκστρατείαν
άμον τον Μεγαλέξαντρον, ντ’ επέρεν την Περσίαν.
Οι τρει’ πα τ’ εμετέρ’ είναι, Έλλενοι, παλικάρια,
ξάι ‘κι φοούνταν τρόικας, ‘κ είναι απιταχτάρια.
Όντες θα έρται ο καιρόν, να παίρ’νε τη ΔΕΗνι,
θ’ εφτάνε επανάστασιν, σκίζ’νε τη διαταγήν ι.
Ατώρα κοίμες ήσυχοι, τίναν έχουμ’ ,εξέρουμ’.
Αβού τα εργοστάσια πώς θ’ έρχουνταν να παίρουν;
Σάββα, Λευτέρ και Θόδωρε, να ίνουστουν εντάμαν,
κι αν έρτανε να κλέφτν ατα, εβγάλτεν και την κάμαν.
Αβού τα εργοστάσια εχτίανε με αίμαν
κι ατώρα, πώς θα παίρνε ατά, όλια με τ’ έναν ψέμαν.
Η Αθήνα ‘κι χορτάεται, καμίαν ‘κι χορτάζει
την θάλασσαν πα να κουρτά, τη γην όλεν ν’ αρπάζει.
Τερέστεν, μη κομπών’νε ‘σας και παίρνε τα καρβόνια
και παίρνε τ’ εργοστάσια με τ’ ευλοϊας όλια.
Γουρεύνε νομοσχέδια εμάς να γαντουρεύνε,
ναϊλί εσάς να βάϊ εμάς τα πλούτια μουν αν παίρνε.
Και το ψωμίν, ντο έτρωγα μ’, θα λέμ’ ατό μαμάκα,
ατοίν τα ημεροκάματα ‘κι δίν’ ατά για πλάκαν.
Γουρπάν εσουν ,τραντέλλενοι, φυλάξτεν τη ΔΕΗ νι
για τ’ έναν μεροκάματον αλλ΄δίν’νε και την ψήν ι!
Οι Τρεί πα απανώτεροι θ’ωριάζνε τα Καϊλάρε
την φλώριναν, τα Γρεβενά, Καστοριά και Κοζάνεν.
Να ζείτεν και να χαίρουστουν με τον λαόν εντάμαν,
καλά δουλείας ποίστεν ούλ’, με τη Θεού το γράμμαν.
Τοι τρείος στιχαρέζουμε αδά ας σην Ρωμανίαν,
να κάθουνταν με το καλόν απάν ‘ς σην εξουσίαν.
