Γιατί δεν υπάρχουν έρωτες νόμιμοι ή μη νόμιμοι. Υπάρχουν μόνον έρωτες χωρίς επίθετο. Ανδρέας Εμπειρίκος, 1901-1975, Ποιητής
Γιαβρόπο μ’, τα φιλέματα σ’ σεκέρια και γλυκάντζια, και τ’ ομματοτεριάματα σ’ τ’ αυγής τα γλυκοχάντσια.
Γιαβρόπο μ’, τα φιλέματα σ’ σεκέρια και μελία κι ας ση σεβτάς τα κρίματα ‘κι ρούει ‘σεν κοινωνία.
Γλυκέα παίζ’ η κεμεντζέ κι η σεβτά αφουκράται, τ’ εσόν η καρδία χαίρεται, τ’ έμον πα καταράται.
Γουεύω να φιλώ ατό , τ’ αρνί μ’, το εντροπιάρκον, άμον αστρόπον συντρομάζ’, τερεί ‘μεν άμον φέγγον.
Γουρπάν ‘ς σο πόϊ σ’ το ζεβλίν και το κυπαρισσένεν, γουρπάν ‘ς σ’ ομμάτια σ’ τ’ έμορφα, ‘ς σα χείλια σ’ τα μελένια.
Γουρπάν εγώ να ίνουμαι ‘ς σ’ ομματί σ’ τα πλουμία, για τ’ εσέν τυριαννίουνταν τη μαχαλάς παιδία.
Γουρπάν εγώ να ίνουμαι ‘ς σο γουϊμετλίν το πόϊ σ’, εγώ για τ’ εσόν το χατήρ’, εσάευα το σόι σ’.
Γουρπάν εγώ να ίνουμαι, ‘ς σ’ εμόν την πελελήσαν, ‘ς σο μουχαπέτ’ αντράγουρος, και ‘ς ση σεβτάν κεφλήσα.
Δείξο με μέρκαικα πονείς, τον τόπον ντο κοιμάσαι, ‘πέ ‘με τα τέρτοπα σ’ ,πουλί μ’, τον Θ’ό σ’ αν αγαπάς ‘με.
Δέντρο μ’, τα χαμελόκλαδα σ’, δέντρο μ’, τα γινομένα, τα μήλα σ’ τ’ ασπροκόκκινα, σεβτάν τονατεμένα.
