Η γούλα ‘τουν…
κι προίκα τουν…
Οι ενδιαφερόμενοι μόνο για το τι
θα φάνε και τι θα αρπάξουν
(λαϊκή ποντιακή παροιμία)
Την Ελλάδαν εκρέμ’σανε
τα πολλά μωχαπέτια,
ντ’ εποίναν ΄΄απανώτεροι΄΄
με τη χώρας τ’ εμέκια .
Θ’ εφέρναν σοσιαλισμόν
κ’ έφεραν τα μνημόνια
να τρώει α’τς εν ο γουρζουλάς
και η κακέσα η φόνα.
Σοσιαλισμόν, ντο λές εσύ,
ίνεται με δουλείαν,
ίνεται με το δίκαιον
και την ισονομίαν.
Τρανόν κακόν εποίκανε
κ’ έγκαν την εφτωχίαν,
τα γράμματα φαντάματα
ένταν ‘ς σην κοινωνίαν.
Οι παλαλοί εχαίρουνταν
‘ς ση παλαλού τον γάμον
κι οι νουνιγμέν’ επλέρωναν
μίαν και μίαν κι άλλο.
Ερρούξαν οι εγνωστικοί
‘ς ση παλαλού τον βίον ,
καμίαν που ‘κ’ εδούλεψαν
‘ς σην ζέστεν και ‘ς σο κρύον.
Ατόσα χρόνια δανεικά
επαίρναν και ‘κ’ εδίναν
και με τα ξένα κόλυβα
μνημόσυνον εποίναν..
Και με τα βοϊβοτέματα
και με τα αλεπέσια,
συντάξεις και ημερικά
εγένταν άμον λέσια.
Μόν’ ο λαόν, ο άχαρον,
εχάσεν τα μουράτια τ’,
απ’ ουρανού κρεμάεται
‘κ’ εξέρ’ μερ ‘κες να χάται.
Ατός οπίς ‘ς σο ΄΄παραβάν΄΄
ατόσον κ’ εν εσπίχτεν
θα σύρ’ τα ψηφοδέλτια
μ’ έναν μαύρον πυρίφτεν…
λεξιλόγιο :
φόνα = η φόνησα. Εμέκια= κόποι προσπάθιες. Βοϊβοτέματα= υποκριτικές γκρίνιες. Αλεπέσια = πονηριές. Λέσια = ψοφίμια. Μουράτια = προσδοκίες. Πυρίφτε = πυρόξυλον από το πυρ και ρίπτω.
