Εάν φονευθώσιν όλοι οι Έλληνες,
ποιος θα πληρώνει το χαράτσι;
Χασάν Γαζή πασάς (Τζεζαϊρλής), 1713-1790,
Τούρκος ναύαρχος & βεζύρης
Αβουτοίν οι τρoοικανοί,
‘κ’ εξέρ’νε ας σα πόνια,
αν επορούν, τον άνθρωπον
με τα ψύα θα τρώνε.
Άμον το χτήνον τ’ αλμεγάδ’,
π’ έν ‘ς ‘σο μαντρίν δεμένον ,
σύρνε, παίρν’νε το γάλα μουν,
θαρρείς κι έν χρεωμένον..
Ας σα δουλείας τη Θεού
‘κ’ εξέρνε ας σον κόσμον,
την παράν ετοπλάεψαν
παράς το ελαδόπον.
Η παρά ,ντ’ εκατέκλεψαν ,
όλεν τον κόσμον φάζει
και τον λαόν να σπάεις ατόν
αίμαν ‘κι καταστάζει..
Τα παράδας, ντ’ επέρανε,
‘πήγαν ‘ς σην εξορίαν
κι ατείν’, τη σκύλλ’ τα παιδία,
κρύφκουνταν ‘ς ση σκοτίαν.
Χρέος το χρέος ‘κ’ εξοφλίζ’
εξόν κι αν φέρτς εξάρια,
αν ρούεις ‘ς σον κατακέφαλον
και στέκ’ς με τα ποδάρια!
Χρέος το χρέος ‘κ’ εξοφλίζ’
βερεσιάν τεφτέρια,
εποίκαν το μιλέτ’ ν εμούν
γεσίρ’ ‘ς σα ξένα χέρια.
Χρωστούμ’ και ‘κι χρωστούν εμάς
κι αν θέλουμ’ παίρουμ’ κι άλλα,
εχάθεν το ναμούσ’ ν εμούν,
εγέμ’νες κοσκοβάρα.
‘Σ σ’ αβού τον κόσμον π’ έκλεψεν
και ‘κ’ έξερεν να κρύφτ’,
τα κρίματα τη κόσμονος
έμπρετ’ ‘κεικά θ’ ευρήκ’.
Ερούξαν από πάν’ εμούν
λέγ’νε ‘μας μαρτουβάλια,
κανείς ‘κι λέει να φέρ’ν ατά
τ’ ευρώ με τα τσουβάλια.
Ο γουρζουλάς να τρώει ατέν
την Άγγελαν, την Μέρκελ’.
τρανόν γιαγκούν και άψιμον
‘ς σ’ οσπίτ’ εμούν εσέγκεν…
