“Θεέ μου, επειδή φοβάμαι να ζητήσω Ανάσταση γι’ αυτά, που ήδη έχασα,
μ’ αφήνεις να κρατήσω αυτά που έχω;”
Τα λόγια ενός νέου στο youtube.
Βάι-βάι το Βαγιών, εσέν’ κερκέλ’ κ’ εμέν ωβόν.
Τα ωβά τ’ εμέτερα τα τσιγκούλ’ τ’ εσέτερα.
ποντιακά παραδοσιακά κάλαντα
.
Βάϊ- βάϊ το Βαϊ, πώς ν’ εφτάμ’ υπομονήν;
Τον Χριστόν ξαν θα σταυρών’νε με τον πόλεμον ΄ς ση γην.
Βάϊ- βάϊ το Βαϊ πώς θ’ ευτάμ’ υπομονήν;
Ο Χριστόν εσταυρωμένος κι ο λαόν ΄ς σο βαϊνασίν.
Βάϊ- βάϊ το Βαϊ ,τρώμε οψάρια και χαψίν.
Το χαψίν πα ‘κι πλερούται, ακριβόν άμον τ’ ασήμ’.
Βάϊ- βάϊ το Βαϊ ,ντο θα τρώμε τη Λαμπρήν;
Σέφτελα με τα ραδίκια κ’ έναν κομματέρ’ ψωμίν.
Τ’ αρνόπα, ντο κρεμαλίουν ‘ς σα τσεγκέλια, ‘ς σο σειρίν,
οφετος ‘κι θα ευρήκ’νε για να ψέουν μουστερήν.
Βάϊ-βάϊ το Βαϊ ,ατσά ποίος θα σουβλίζ;
Να εβγαίνουμ’ και μυρίζουμ’ τ’ αρνίν, πώς θα σκουντουλίζ’!
Βάϊ- βάϊ το Βαϊ, εμείς κερκέλ’ κι ατοίν ωβόν,
εμείς πουσίντια και μαλέζ’ κι ατοίν τσιλγόνια και πετμέζ’.
Η Τρόικα εφέκε ‘μας ν’ εφτάμε ΄΄καλόν Πάσχα΄΄.
Με το ραβδίν θα κλώσκεται και κρούει απάν ΄ς ση ράσαν.
Εδέκε ‘μας κι έναν χασλούχ’ να κομπών’ τα παδία,
ατά ντ’ επαρεπείνασαν κ’ έκλωσαν τα ζεβλία.
Ανάσταση θα ίνεται αξάν για τοι ζεγκίντς
τ’ έμπρια όλε, ντ’ επέρανε, κ’ εσπόγγσαν και τ’ οπίς.
Χριστός ανέστη εκ νεκρών και θάνατον πατήσας,
αβού το μελμεκέτ ‘ν εμουν μ’ έναν ομμάτ’ τερεί ‘σας.
