Πολιτική σάτιρα Άναβα την Κυβέρνησιν ( Εκτός από την κυβέρνηση)
Άναβα την κυβέρνησιν
και την καβαλαρίαν,
ούλ’ εκατήβαμε ‘ς σον άδ’
και ‘ς σην ανεχετείαν.
Αν επορούνε με την ψήν
θα βάλνε ‘μας ‘ς σο χώμαν,
ας σα τσοπλίκας να τρώμε
και ‘κοίμες ‘ς σ’ έναν στρώμαν
Αναθεμά ‘τον, π’ έλεεν
παράδας ευρισκούνταν,
ατός εσκώθεν, έφυεν
κι ατόναν καταρούνταν.
Κι ο Σαμαράς, π’ εγούρευεν
Ζάππεια, παραστάσεις,
έρθεν, εγέντον ζαμπαράς
κ’ εκόπεν ας σην χράση .
Τ’ ομμάτ’ν ατ’ πα εκόρωσεν
εκρέμασεν τη γούλαν,
κάποτε έτον ζαμπαράς
ατώρα εκάτσεν τούλα.
Το Κ.Κ.Ε. πα έλεεν
ελάτεν με τ’ εμένα,
ν’ εφτάμε επανάστασην
και τρώμ’ ας σα κλεμμένα.!
Μανάχον ο Τσίπρας χαίρεται
και παίζ’ την κεμεντζέν ι,
πολλά ‘κι πάει, θα ίνεται
ατός πα κεπεζέν ι.
Χρυσή Αυγή πα έντονε
κόμμαν πολλά τρανόν, ι
απάν ατς χοβλαεύτανε
και κρούν’νε ‘ς σο σταυρόν ι.
Και ο Καμένον τάεται
να φέρ’ ισονομίαν!
έναν δεκάραν ,π’ έκλεψαν,
θα σείρ’ν ατς ‘ς σα σκυλία!
Κι αέτς πορεύκουμες και πάμ’
‘ς ση χαμονής τον τόπον,
γυρισμονήν οπίσ’ ντο ‘κ’ έχ’
και νέ μιγκίν και τρόπον.
Λεξιλόγιο: Άναβα = εκτός από, καβαλαρία= καθήμενοι στο άλογο της εξουσίας. ανεχετεία= ανέχεια, τσοπλίκας= σκουπιδότοποι, εγούρευεν= έστηνε -μεθόδευε,
ζαμπαράς= ξεφτίλας- ανήθικος, (φρ.)εκάτσεν τούλα= φοβήθηκε- συμβιβάστηκε,
Κεπεζέν,ι= ξευτελίστηκε, χοβλαεύτανε= επιτέθηκαν, μιγκίν= διέξοδος -τρόπος
