Συμβαίνει τώρα
Αρχική > Στήλες > Καφέ Ρωμανία > Σύγχρονοι μωμογερικοί διάλογοι! Γράφει ο Παναγιώτης Μωϋσιάδης

Σύγχρονοι μωμογερικοί διάλογοι! Γράφει ο Παναγιώτης Μωϋσιάδης

Μοίρασε το άρθρο...Share on Facebook
Facebook
Tweet about this on Twitter
Twitter
Email this to someone
email






Τα πρόσωπα :

 

Μπέης:   Σόιμπλε γερμανός ντερέμπεης πάνω στο αναπηρικό καροτσάκι .

Κυζίρτς: έλληνας  πρωθυπουργός.

Διάβολος: ο κακός εαυτός του Έλληνα

(Το σκηνικό διαδραματίζεται στην έδρα του Γιούρογκρουπ στις Βρυξέλες.

(Η λύρα παίζει χαμηλά, ένα βαρύ ποντιακό μοιρολόι)

Οπέρτς πα εφτωχός έμνε, οφέτος τσίπ’ εχάθα,

επέρα την τσάνταν ‘ς σ’ ωμί μ’, για τα χωρία εχπάστα.

( Ο Μπέης είναι καθισμένος σε ένα επίχρυσο αναπηρικό καροτσάκι, στο κέντρο του παλατιού.

Γύρω του πολλοί ακόλουθοι τον συνοδεύουν, υποκλινόμενοι με  μεγάλο σεβασμό.

Αυτός με το υπεροπτικό του βλέμμα και το αγέλαστο σκληρό πρόσωπο  ρίχνει περιφρονητικές ματιές  στους φτωχούς υπηκόους Έλληνες,  που ήρθαν να τον ζητήσουν  βοήθεια..)

Ένας από αυτούς είναι και ο Κυζίρης ο έλληνας πρωθυπουργός,   ο οποίος τον πλησιάζει διστακτικά  και με φωνή τρεμάμενη του μιλάει σε άπταιστα ποντιακά.

Κυζίρης : Τον Θεό σ’, αν αγαπάς, πολυχρονεμένε μ’ μπέη ,εγώ εφτωχός και μωατσίρτς άνθρωπος είμαι, τα παράδας ιμ’ ετελέθαν και τα παιδία μ’ νηστικά και πεινασμένα επέμναν ‘ς σα στράτας .

Αποδεθέν έναν ομούτ’ ‘κ’ έχω , για τ’ ατό έρθα ‘ς σα ποδάρια σ’ , να δίς ‘με ένα δύο παραδόπα , να παίρω κατ’ και φάζω ατά.

Σόιμπλε:  Ολάν, ‘κ’ εντράπες κ’ έρθες ξαν ‘ς σα ποδάρια μ’ ,σκύλλ’ αφορισμένε… Ατό η δουλεία μίαν ‘κ’ έν και δύο ‘κ’ εν. Επέρες ατό κ’ εστάθες ..! Ο  νους ισ’ πάντα ‘ς σο ζητείον … Επουγαλεύτα με τ’ εσέν τον γραίκον….!

Κυζίρτς :   Εξέρω , αφέντα μ’, το καπαέτ τεμέτερον έν,   άμαν ας εξέρτς ατο,  ατοίν οι πασοκάντ  και οι νουδάντ, όντες εγροίξαν θα παίρω την κυβέρνησην, έτρεξαν κ’ ευκέρωσαν όλια τα τράπεζας κ’ εφάνθεν τη σεντουκί ο κώλον.

Σόιμπλε: Νέπε, αγιαράευτε,  και έρθες σ’ εμέν να δίγω ‘σε τα κλεμμένα τα παράδας ,ντ’ έρπαξαν τ’ εσετέρ ;

Εγώ άλλο παράδας ‘κ’ έχω να  δίγω ‘σας, επουγαλεύτα . Εσείς τα παράδας άμον μαυρολάχανα τρώτε ‘τα

και πεινασμέν’  απομένετεν .

Κυζίρτς: Γουρπάν ‘ς σα τσακλιάρια τ’ ομμάτια σ’, Σόϊμπλε,  δός ‘με ένα δύο παραδόπα ν’ εβγάλω τη χρονίαν , να κυβερνώ εγώ πα άμον αριστερός ολίγον την Ελλάδαν . Ατόσα χρόνια το ΠΑΣΟΚ έχεσεν κ’ έφαεν … Ας εξέρτς ατο, ο λαόν εξόν ας σον ΣΥΡΙΖΑΝ κανάν ‘κι πεενεύκεται…!   Άν αγαπάς  την Ελλάδαν, δός ‘με την παράν ας δεβαίνω πλάν. Άλλως τα χρέητα μουν όλια ‘ς σο κιφάλ ισ’ θα ρούζνε.

Σόιμπλε : ( βάλ τα χέρια τ’ ‘ς σα τεκίρια τη καροτσί και λαγκουνίεται δεξιά- ζεβρά)

Όσα  και να λές ‘με, ση κοφού δεβάζ’ατα, ας εσάς, ντο είδα, είδα και τ’ άλλα πα επαρείδα.

Εσείς οι Ρωμαίοι, άμον ντο παίρετεν την παράν όλια ανασπάλετεν, τα μνημόνια πα και τα μεταρρυθμίσεις πα.   Αρτούχ παίρετεν τα κεμεντσέδες και τρέχετεν ‘ς σα μωχαπέτια..

Κυζίρτς : ( γονατίζει μπροστά στον Σόιμπλε και με κλαμένο ύφος τον παρακαλεί)

Γουρπάντς, αφέντα, εγώ τον λόγο μ’ δύο ‘κ’ εφτάω , το κιφάλι μ’,  σ’ αξινάρ βάλω και το μνημόνιον ‘κι καταπατώ. Δος ‘με την παράν εσύ και τέρεν εγώ, ντ’ εφτάγω  τοι τραντέλλενους…

‘Σσα δύο μήνας απάν’ ούλ το ψωμίν΄΄ μαμάκα΄΄  θα κουίζνε. Τα σκηλία τουν  και τα κουνία τουν πα θα φορολογώ..! μανάχον την παράν..!την παράν  λελεύω ‘σε …! την παράν δός ‘με και γυρευόν πέει ‘με..!

Σόιμπλε:  Δέβα, χάθ’, λέω ‘σε. Εγώ όρκον εδέκα, εσάς τοι Ρωμαίοις άλλο παράν ‘κι δίγω . Εσείς τον διάβολον τσαρούσια φορίζετεν κι εμέν κι θα γαντουρεύετεν.  Δέβα, δέβα Κυζίρ, έπαρ’ και δός ‘με τ’ οσπίτια και τα οικόπεδα. Εξέρτς εκείνα τα παραθαλάσσια και ύστερα έλα να  δίγω ‘σε την παράν..

Κυζίρτς : Όι..!  αφέντα μ’, τον Θεό σ’  αν αγαπάς,  εύκαιρον μη στείλτς ‘με .

Άλλο οπίς να πάω κ’ επορώ. Καλλίον σκότα ‘με ,λέω σε. Άλλο εκείνε η γαρή μ’ ‘κι ζαπλαεύκεται .

 Σόιμπε:  Ντο είπες;  Έεις γαρήν;   Και ντο θα εφτάει η γαρή σ’ τα παράδας.  Ολάν γιουνάν αφορισμένε, θα δουλεύουμε εμείς οι Γερμανοί και τ’ εσόν η γαρή θα φορεί και λάσκεται;

Δέβα, χάθ’ αγλήγορα απ’ εμπροστά μ’, τ’ ομμάτια μ’ μ’ ελέπνε ‘σεν.

Κυζίρτς:  Όχι, όχι αφέντα Σόιμπλε,  αν ‘κι δίς ‘με την παράν, εγώ  οπίς ‘κι πάω. Έχω και τρία εκατομμύρια  γεροντάδες, ντ’ αναμέν’νε την σύνταξην ατουν. Άν ‘κι σκοτών ‘με η γαρή μ’, ας σοι γεροντάδες γλυτώμονήν ‘κ’ έχω … Δός ‘με τα παράδας  και έναν χρόνον την γιαχά σ’ θ’αφήνω .

Δός’ με ας πάω χάμαι.   Κανείται ,ντ’ ετυράνντσες ‘με..

Σόιμπλε: Εγώ χαζίρια παράδας άλλο ‘κι δίγω ‘σας.  Εσείς  το βούδ’ τρώτεν κι ας σον χασάπ’ παράδας ψαλαφάτεν..  Άμαν αφορισμένε γκιαούρ   για πέει ‘με, ντο εγγύησην βάλτς για να δίγω ‘σε την παράν..!

Κυζίρτς ( σαστισμένος) Κι α ντό εγγύησην ψαλαφάς;  Όσα  είχαμε επέρετε ‘τα, τ’ αεροδρόμια, τα λιμάνια, την ΔΕ.Η, τον ΟΤΕ, τα νερά μουν…! άλλο τιδέν’κ’ έχουμε να δίουμε  ‘σας.

Διάβολος:: ( πλησιάζει πονηρά τον Σόιμπλε)  Άφεντα, αούτος ο τσιπλάκς τιδέν ‘κ’ έχ’ να δί.

Ο κώλος ατ’ πα τσεριμένον έν’,  ψαλάφα τη γαρήν ατ’.

 

Σόιμπλε: Ντο να λέω ‘σε ,κυζίρ, εγώ χωρίς εγγύησην παράν κι δίγω ‘σε … εξόν και αν δίς ‘με τη γαρή σ’ έναν βράδον ‘ς σο κρεβάτ’ ιμ’.

Διάβολον ( χαρούμενος) Κύζίρ’, δος ατεν, δος ατεν,  πολλά παράδας θα δι’ ‘σε,  παλαλός μ’ είσαι… γαρήν θα ευρήκς, άμαν πρωθυπουργίαν  άλλο ‘κι θα ελέπς. Δος ατέν ..δός ατεν ,λέγω ‘σε,  δος ατέν …!

Κυζίρτς:  (τρομαγμένος )Ντο είπες..!  ντο είπες ..! να δίγω ‘σε τη γαρή μ’ ; Θεέ και Κύριε,  ντο είν’ αβούτα τα ζαμπαραλούκια ; Νε αφορισμένε χίτλερ’,  νε ανέντρωπε ποσπογάζ’ ,εμείς οι Ρωμαίοι ‘κ’ είμες άμον κ’ εσάς πεσλεμέδες, εμείς τη γαρήν ας σο κιφάλν εμούν κι απάν έχουμ’  ατέν .

Νέ οτουρμάζ’ η γαρή πα δοχκάται;  Άλλο ντο θ ακούμε…! Γαϊδάρ’υιέ,  με ντο έεις την παράν θα γαμείς μας κιόλε…

Να χέζω και σα παράδας ισ’ και ‘ς σο σουράτ ισ’ το τσιπλέρκον.  Τα κάκκαλα μουν  τρώμε κι αοίκα  παράδας ‘κι θέλουμε .

Σόιμπλε:  Κι δίς ατεν… νι.;  και ντο θ’ εφτάτεν χωρίς παράν; Θα ψοφάτεν και χάστουν ας σον κόσμον…!

Ας σου ‘κι δις τη γαρή σ’ ο Θεόν να ελεά ‘σε… Σουκ,  φύον απ’ εμπροστά μ’ κι άλλο μ’ ελέπω ΄σε.

Κυζίρης: Άκ’σον, ντο θα λέγω ‘σε. ‘Σ σ’ αβού τον κόσμον με την παράν κανέναν ‘κ’ έθαψαν..

Να χέζω την παρά σ’ και τ’ αγέλαστον το σουράτ’ ισ’.  Κοντόχρονος και κακοψοφεμένος να ίνεσαι .

Νε αγέλαστον και κακοπαγιάνευτον σκυλίν . ‘Σ σα τεκίρια απάν να ψοφάς και χάσαι..

Σόιμπλε :’Σ σον κρεμόν και ‘ς σον αγύριστον να πας ,γκιαούρ’ μιλέτ’..

Και τα τράπεζας πα θα τσουπώνω και τ’ οσπίτια σουν θα παίρω και τ’ εργοστάσια και όλια, ντο έχετεν, ους να ψοφάτεν και χάστουν ας σον κόσμον απάν.

Κυζίρτς:  Εμείς πα άλλο ‘ς σον πρόσωπον εσουν κι θα τερούμε, την γαϊλέν εσουν ‘κ’ έχουμε.

Το χρέος εμούν ξάι μη ψαλαφάς ατό,  εμείς ‘ς σο χρέος ξάι ‘κ’ έρχουμες …

Εμείς ατό καμίαν κι ανασπάλουμ ατό..!  Για πάμε ‘ς σον Άδ’ και στείλουμ’ ατο…!  για έρχουστουν και δί γουμε ‘σας.

Σόιμπλε : Ντο είπες, ντο είπες; ‘κι θα δίτε ‘μας το χρέος ; Ατότε να κλώσκουστουν οπίς σην δραχμήν και ψοφάτεν και χάστουν ας σον κόσμον απάν.. τεμπέλ και κλεφτάντ ρωμαίοι.

Κυζίρτς:   ‘Σ σο κατσί σ’ χέζω και τα βλαστημίας ισ’ ‘κι σ’κώνω. Η  Ελλάδα ‘ς σον κόσμον απάν, έναν και μαναχόν ,μπλουμίν και μάλαμαν. Όλεν ο κόσμον για τ΄εμάς λέει και θαμάεται , κ’ εσύ ανασκάφ’ς και υβρίεις ‘μας;

Άλλο μίαν ‘ς ση θάλασσας το γιαλόν γουρπάν θα εφτάμε ‘σας.. Ήλεν θ’ ακούτεν και ήλεν ‘κι θα ελέπετεν

( αυτά είπε και γύρισε την πλάτη να φύγει)

Σόιμπλε: ( έμεινε έκπληκτος από την απάντηση και τον κάλεσε να γυρίσει)

Νέπε Κυζίρ’, νέπε Κυζίρ, εστά, εστά, ντο φεσάτς κ’ ευτύχολος είσαι; ‘ς σ’ ιφτιάρ’ ισ’ κόπρον ‘κι κάθεται .

Έναν λόγον είπαμε και άμαν εχολιάστες ..: Ολίγον τοι Τούρκς ‘κι ομοίαζετεν, αλισβερίσ’ πα ‘κ’ εξέρετεν ν’ εφτάτεν .

Κυζίρτς:  Ζατί εμείς αέτς κι αές εγέμνες τη καλαμιδί.. ‘ς σ’ οσπίτ’ ν εμουν πεντικός ‘κ’ αλευρούται… εσείς πα το σκατόν θα παίρετεν …! ΄΄ χρωστώ και ‘κι χρωστούν εμέν κι αν θέλω παίρω κι άλλα…΄΄

Σόιμπλε : Νέπε γκιαούρ, ντο ποσπογάης είσαι, εσύ τον διάβολον τσαρούσια φορείς…

Κυζίρτς: Και τα πολλά, ντο θ’ εφτάμε ‘σας οπίσ’ είναι: το πετρέλαια και τ’ αέρια όλια θα δίγουμ’ ατά τοι Αμερικάντς.  Εσείς πα θα τερείτεν άμον τη Μουρούζ’ τον σκύλον….

Γιατ’ ατό  χάσον, ντ’ εξέρτς Σόιμλε, και ντο θα λές ,πέει ‘με..

Σόιμπλε : ( σαστισμένος) Μη τερείς ντο είπα ‘σε. Εγώ το χατίρι σ’ κι χαλάνω,  όλεν την παράν θα δίγω ‘σε  και την Έλλάδαν ‘ς σο κιφάλ’ ιμ’ απάν θα έχ’ ατέν . ΄΄ Χάι Γκρίχελαντ..΄΄

Κυζίρτς ( μονολογεί) Αβούτος έν’ τη σκύλλ’ ο γιόν, γιόξαμ εμεταλλάεν τ’ απέσ’ ατ’..  Θεέ και Κύριε, αείκος τσαμουρόχτιστος άνθρωπος πα ίνεται;

Σόιμπλε :Γράψον πόσα θέλτς  και δέβα ‘ς σο καλόν…   Όσα  είπαμε αδακά ας απομέν’νε….

( Ο Κυζίρτς πήρε ένα χαρτί, έγραψε πάνω ένα ποσό και έδωσε το χαρτί στον Σόιμπλε, που, αφού το διάβασε, του απάντησε)

Σόιμπλε: Νέπε.. εκατόν εκατομμύρια πα ντο είν’ ‘ς σε σας κερέν, αν θέλτς έπαρ’ διακόσια… Εμείς παράδας πολλά και πάμπολα έχουμε ..  άμαν ας σ’ εσέτερα τα ευλοϊας  τιδέν..!

Ο Θεόν εκαταράθε ‘μας να ζούμε ‘ς σα βρεχία και ‘ς σην δείσαν απές.

( Ατά είπεν κ’ επέρεν  τον κυζίρ’ σην οτάν απές, ένοιξεν το σεντούχ’  εγόμωσεν το δίσακον ατ’ ούς απάν πεσίν παράν κ’ εδέκεν α’ τον Κυζίρ.)

Κυζίρτς : Σόιμπλε μ’,  αρ να είσαι καλά… το καλόν ντ’ εποίκες ο Θεόν να πλερώντς ατο..  .Άμαν ας εξέρτς ατό ‘ς σα έξ’ μήνας απάν εγώ ξαν  αδακές ‘ς σα τεκίρια σ’  ολόερα θα τολανεύκουμαι .. Εσύ την δουλεία σ’ εξέρτς…

Όντες δις τον τσιπλάκ δέκα,  μαθίεις ατον και ‘ς σα εκατόν ….!

Μοίρασε το άρθρο...Share on Facebook
Facebook
Tweet about this on Twitter
Twitter
Email this to someone
email

Στείλε μας Φωτογραφίες, Μηνύματα και Καταγγελίες στο [email protected]
kotzampasis

Συντάκτης: Παναγιώτης Μωϋσιάδης